يوم الأحد
الثالث عشر من رمضان
الخامس و العشرون من ابريل، نيسان 2021
سميها اتغلبت
سميها نتيجة
سميها حقيقة
سميها زي ما تسميها
في الواقع.... انا تعبت
تعبت من العالم الافتراضي
تعبت من الشاشة اللي منورة مستنزفة ساعاات و ساعااات من عمرنا
تعبت من الصور الغير حية بالمشاعر
الصور المهندمة اوي زيادة عن اللزوم
تعبت من الفيدوهات الولاحاجة الإستغلاليه اللي من وراها لعاب بيسيل علي الفلوس
الفيديوهات اللي اهانت الأصول و أ-ب إنسانية
الفضايح...الجرايم
من الحياه اللي بتبقي غريبة في عيني كل يوم عن التاني
تعبت من السهوله،
مش علشان انا ضعيفة و بنقاد
علشان انا مش قادرة اتحمل الزيف
عقلي مش قادر يتحمل
في صراع..
في مقارنة...بين انه عادي الحياة كده لازم نجاريها و بين زمان الحي عن الواقع اللي عايشينه دلوقتي
انا بس مش قادرة اجاري التمثيل و الإدعاء
مش قادرة اجاري المؤثرين الغير مؤثرين،
مش قادرة اجاري اللون الأحمر اللي بيقولي افتحي الصور دي او المسج دي
مش قادرة اجاري الجبن و سهولة اهانة الناس من ورا شاشة
مش قادري اجاري حروب فرض الآراء الوقحة
مش قادرة اجاري تسليط الضوء علي الغلط و السلبيات
مش قادرة اجاري الرسايل اللي بيتقلك فيها كلمتين بس" ازيك عاملة ايه"
ازيي !!! عاملة ايه !!!
تعبانة
حيرانة
يا بشر..
عايزة اتكلم
عايزة افضفص
عايزة احكيلك وجها لوجه مش شاشة لشاشة
عايزة اتفاعل بحواسي اللي ربنا خلقها
اشوفك اسمعك المسك امشي معاك
مش كلمتين تقضي بيهم واجب
استنفذتني المشاعر السهلة الغير واصلة
طب...
احس ازاي بلهفتك
احس ازاي بقلقك
احس ازاي بتوترك و ارتباكك و انت بتعبر عن مشاعرك
طب اشوف ابتسامتك
اسمع صوتك
نواسي بعض بطبطبه
طب كل ده علي بعضه
التطور طبيعي
التطور هو الحياة
التطور هو تطور العقل اللي بيطور الحياة من العناصر اللي المُفككه اللي متبعترة قدامه
انا كارهة الأنقياد زي القطيع
كارهة التقليد
كارهة الانقياد وراء التقدم بعقل زي العلبه الفارغه اللي بتردد بس الأصوات
كارهة الأنقياد اللي موت احساسنا و خلانا اصنام ورا شاشات
انا عايزة ٩٠% حياة و الباقي زي ما تيجي
بس...
Follow Milky Way
تابعونا
